نصائح للمخطوبات ....!

نصائح للمخطوبات

آنستي العزيزة.. لو ربنا فك عقدتك.. واتخطبتي.. فإليك نصائحي حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثواه الأخير

أجمل ما في الخطوبة العزومات الرومانسية.. على أحلى محلات أكل ف البلد.. واللي عمرك مانتي شايفاها بعد الجواز.. المهم نصائحي لك عند أي عزومة مع خطيبك..

1- الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولا من البوز زي الخنجر ولا من فوق طبعًا

2- العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري.. أوعي.. العيش بيتقطع بالسكينة ف الطبق.. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جداااوبعدين لما تروَّحي.. إبقي حِفِّي زي ماانتِ عايزه....

3- الشوووربة.. أبوس كعب رجلك.. بند الشوربة ده مهم جدًا.. الشوربة تتشرب من غير صوت خالص.. ومن غير ماتقعدي تنفخي فيها.. زي القهوجي اللي بينفخ في الحجر للزبون.. وطبعًا عايزاكى تنسى تمامًا.. السلطانية اللي بتقيميها علىبقك ف البيت.. وتدلدقي على روحك..
بالمعلقه وبدون صوت.. سخنة ولعة برضه بدون صوت.. وتسيبي تلت الطبق ع الأقل.. مش تميليه.. عشان تلهطيها لآخر نقطة.....

4- الرز طبعاً .. بيتاكل بالشوكة.. أوعي إيدك تتمد ع المعلقة.. وتغرفي من طبق الرز وتعبي.. إوعي.. الرز بالشوكة.. وكأنك بتبوسيه مش بتاكليه..

5- المكرونة.. الاسباكتي.. برضه بالشوكة.. تتلف على طرف الشوكة.. لحد ماتخلص وبعدين تحطيها ف بؤك من سكات.. مش تشفطي المكرونة عود عود..

6- السمك.. مشكلة.. شوفي.. بتفصلي اللحم عن الشوك.. إزاي..؟؟ تقطعي اللحممن النص.. بالطول وبعدين تفردي اللحم ع الجانبين ولما تخلصي ناحية.. متقلبيش السمكة.. بلاش فلح.. شيلي السلسلة بالشوكة والسكينة وحطيها ف جنب الطبق أكل النص التاني.. وبدل الفيلم الهندي ده.. نصيحة.. ماتكليشالسمك خالص.. قولي مابحبش السمك وخلصي نفسك..

7- الجمبري.. -إذا كنتي عارفاه-.. أول ماطبق الجمبري ينزل.. بصيله بقرف و احتقارشديدين قال يعني زهقانة من كتر الجمبري الجامبو ف بيت ببا. . وأتنهدي جامد وقولي.. برضه..؟؟؟ وتروحي قاطعة راس الجمبريياية.. بالشوكة.. أنا ف عرضك إنسي المصمصة دلوقت..

8- البطاطس سواء مسلوقة أو محمرة.. أوعي تهرسيها وتدبيها ع الرز وتدي .لا..لآ...لآ...بالشوكة حتة حتة وإنت زي ما تكوني هاتعيطي من كتر ماالبطاطس صعبانة عليكي..

9- الفاكهة.. لو الفاكهة فيها بذر.. طلعيه من بؤك بالراحة وحطيه ف إيدكوهي مقفولة.. وبعدين ف طفاية السجاير اللي ع الترابيزه.. أوعي ياحبيبتي مننظام التفتفة للبذر.. إنسي....

10- ولما تخلصي أكل تحطي إيدك على بطنك.. -اللي عصافيرها بتصوصو منالعينات اللي كلتيها-.. وتقولي له مش ممكن.. أنا عمري ما اتفجعت كدة.. أناأودامي أسبوع.. هابطل أكل فيه.....

وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. آل يعني بتمسحي بؤك..
وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول والطعمية اللي جايباها معاكي..
و بالهنا و الشفا

lol!

هههههههههه

كان فين الموضوع ده يا زهره

جميل والله

هههههههههههههههههههه

طب لو معملتش النصايح دي يا زهرة

يبقي ايه الحل؟ الطبع غلاب

و بعدين عايزة تخمينا ليه

هههههههههههههههه

ليه الفضايح دي يا زهرة

بكرة كله هيبقى عالمكشوف يازهرة
والمستخبي هيبان
بس طريقة السرد جميلة ومضحكة للغاية