جريمة اغتيال

جريمة اغتيال // للشاعر // محمد أبو زيد الاسيوطي
متهم
الشعب كله بالفشل
في الوصول
و أتقفل باب الحلول
وأتقل فينا النضال
والنزول
أسرع ما يمكن
يعني قول
لا مفيش إصلاح حقيقي
لاء مفيش
كلمة حتي تبل ريقي
لأجل أعيش
أو مجرد احتمال
إننا نبدأ نعيش
إننا نصعد لفوق
لا مفيش
طول ما بتزيد الفروق
وضعنا لازم يسوء
واللي فوق ح تنوا فوق
واللي تحت يتنوا ينزل يختفي تحت الرمال
واللي عايش بالحلال
مش ح يلقي ليه مكان
مش ح يبقي حد حر
في اختيار
كل لحظة عليه تمر
عيشته نار
يبقي طعم حياته مر
ليل نهار
كل ما يعطش يقوم
يشرب ويأكل م الهموم
باختصار
يختفي تحت الهدوم
لما تلقاه راح وزال
والسؤال
لو حقيقي الشمس طالعة
ولا نور حد شمعة
والأمل ليه تاني رجعة
ليه حداد الهم طال
ليه صحيحنا في يوم مرض
ليه حصارنا بيتفرض
ليه ماضينا بينقرض
لما قرب ع الزوال
لما يجمعنا لئيم
كل كلمة سين وجيم
يبقي عايشين في نعيم
ولا عايشين في احتلال
لو أنا غلطان في فهم
ولا عايش وحدي وهم
كدبة جوايا وخيال
نوروني فهموني
واضر بولي عليه مثال
يعني قصدك إيه يا عم
مكفياك أحزان وغم
يعني لم
بقي وعيش
ولا ناوي تقول مفيش
للوجود أصلا مجال
ماكفياك حزن وكآبة
وارحم الناس الغلابة
أنت جاي تدي إجابة ولا تطرح ميت سؤال
اعذروني ليا عذري
الحياة سودة في عنيا
وانحني من اليأس ظهري
يا ما شال م الحزن مية
صنفوني أني فقري
الحكاية هيه هيه
حد ينكر
أننا بعنا القضية
من زمان
والبلاد سبناها لعبة
لليهود والأمريكان
والسجون صبحت ملانة أبرياء
والأمانة
والتدين في الزمن أصبح بلاء
والحياء
بقي عيب وشوفنا الوقاحة بقت
رسالة
والتفاهة تبقي فن
شيء صحيح فعلا يجن
غيروا كل القيم لبسوا الحق الضلال
والضلال
مبقاش أذي
بقي مثل بيه يحتذي
يضرب بيه المثال
والأمل بقي مسرحية تمثلية
كل إبطالها خيال
والمصير
بقي في أيد عميل
باع بلاده لاحتلال
و الجبان
أصبح بطل
والبطل هوه اللي خان
كل ده شيء مش غريب
هوا ده نهج الحبيب
والرسالة
اللي نزلت م السماء
قولوا فل يحيا الإخاء
قولو فلتحيا العدالة
واضحكوا وارضوا البلاء
لو حقيقي دي الرسالة
احنا مش عايزين رسل
في الخرافة والرذالة
كلنا نبقي أنبياء
مبعوثين نحيي الضلالة
بعد عصر من الرخاء
يا ما شاء الله عليكم
الغباء أصبح ذكاء
مكفياكم ارحمونا
متقولوش انه ابتلاء
دا الحرام في البطن شونة
من المعونة
اللي مخلوطة بدماء
من ضحايا المسلمين
والعرب والأبرياء
بس أقولك إيه حرام
مستحيل ده يكون سلام
واللي داق
الظلم شاف
م العذاب ألوان وفاق
مستحيل
يرجع يخاف
أو ينام
و الموت خلاص فوق الكتاف
وأنت لسه تقولي قال
ما انتهينا واندفنا
كلنا تحت التراب
السنين حنضل و شلنا
عارنا محمول ع الرقاب
والخراب في بلدنا زاد
وأنت جاي بتقولي قال
هيه ناقصة إسوداد
مالها أحوال البلاد
أنت عايز بس تنقد
ما الأمور ماشية وعال
ما ح أقولك ع الفساد
شايفه بعيونها الرجال
مش ح أقولك أي حاجة اصلوا مش زمن الشهادة
ايوة مش زمن القتال
واللسان حب السكوت
والخراب دخل البيوت
والحقوق لما تموت
مش جريمة اغتيال

متهم
الشعب كله بالفشل
في الوصول
و أتقفل باب الحلول

الله يا خواجة

Admin عدد الرسائل : 315 تاريخ التسجيل : 13/03/2009

مستحيل ده يكون سلام
واللي داق
الظلم شاف
م العذاب ألوان وفاق
مستحيل
يرجع يخاف
أو ينام

مسكورررررين لمروركم

الغباء أصبح ذكاء
مكفياكم ارحمونا
متقولوش انه ابتلاء

» (جريمة عشق )
» اقبح جريمة سرقه
» أبشع جريمة قتل لطفل أمريكي ...بالصور