دي حكمه .. اكتشفتها النساء من زمان علشان كده .. مفيش لها براءة اختراع.. لانها فعلا صحيحه.. او علي الاقل .. فيه علاقه المطبخ .. و الحب والغرام.. وهي ان الاستاذه معده مفتوحه عل البحري زي سمكة القرش..
ممكن الاستاذه تكون شاطره جدا في الاكل والطبخ وبعد كده مع اول حب تلاقي اول مره يتعجن منها الرز
ممكن كمان مس جوليت لما يتعزم عندهم روميو .. تلاقي حاجه غريبه .. اجمل اكل طلع في حياتها .. ومش هتقدر تطلع طعم زي كده تاني.. دي روعه اللقاء الاول.. والعلاقه فيها واضحه بين القلب والمعده
اخوانا الدكاتره اللي معندهمش قلب ( وده واضح من فواتيرهم ) بياكدوا ان لما الانسان بياكل الدم بيتجمع عند المعده ..لان الدم رسول القلب .. يعني مفيش علاقه اكبر من كده ولا مباشره زي كده.. يعني تقدر تقول ان دقات القلب ممكن بدل ما تدق لحن حب .. وتقول نم تم تم تم تم .. تفضل تقول : عنب عنب عنب عنب .. او سكر سكر سكر سكر.
حبايبنا الولاد اكتشفوا قلب المراه في الحكايه دي ( حكاية الاكل يعني ) .. يقوم تلاقي الاكل ميتوصفش ومش ممكن تقدر تاكله ( من السوء ) وتلاقي ادم بيقول شعر في الاكل .. لانه خايف من لعنة الفراعنه .. لو قال : لم اري اكلا بهذا السوء..
زي ما الحياه لها رموز في الحب مثل الورده والاحرف الاولي والذهب والخواتم وكده .. برضه الاكل له رموز رومانسيه .. يعني لو قابلت حبيبتك ع الكورنيش.. مش هتاكلوا محشي ولا كباب ولا كفته.. ولا هتاكلوا اتنين كيلو مشمش او منجه ..ولا زبيب حتي مع ان الزبيب بيعبر عن الحب والغرام .. مينفعش .. لكن رموز الحب دايما زي الورده والمنديل مش اكل بجد يعني .. ولكن مجرد رمز للحب وسنينه .. يعني مثلا فشار .. لب وسوداني ( لو كنت بتحب واحده سوداني ).. وممكن لب سوري ( لو بتحب واحده سوريا ).. ترمس .. جيلاتي .. دره مشوي .. بطاطا مشويه .. المهم تكون حاجه مشويه علشان تتناسب مع قلبك المشوي ..
الخميس 05 يوليو 2012, 7:50 pm من طرف لؤلؤة البحر
